برقم الجلوس..فتح باب التحويلات وتقليل الأغتراب بين الكليات للمرحلتين الأولي والثانية للتنسيق مساء اليوم
بعد إعلان نتيجة المرحلة الثانية سيتم فتح باب التحويلات لطلاب المرحلة الأولي والثانية بكره ان شاء الله
تقليل الاغتراب بينقسم الي نوعين
تحويل مناظر //
وده بتحول من كليه في محافظة بعيده عنك إلي نفس الكليه في محافظة أقرب وليس العكس وليس شرطاً انك تكون جايب مجموع الكليه في محافظتك يعني لو أنت من سوهاج وجالك أداب أسوان تقدر تحول لأداب سوهاج حتي لو مش جايب مجموعها. بس مينفعش تحول من كليه في محافظتك الي محافظة أخري
تحويل غير مناظر//
وده بتحول من كليه لكليه تاني خالص يعني من أداب لتربيه مثلا وعشان تحول لازم -تكون جايب مجموع الكليه إلي عايز تحول ليها ولازم -تكون في محافظتك يعني لو من سوهاج وجالك كليه أداب سوهاج وعايز تحول لكليه تربيه لازم تكون جايب مجموع كليه التربيه في سوهاج يعني لو مش جايب مجموع تربيه سوهاج وجايب مجموع تربيه القاهره مينفعش تحول ليها
لازم لازم تكون جايب مجموع الكليه في محافظتك لو جايب مجموعها في أي محافظة تاني غير محافظتك مينفعش تحول ليها.
وعادي تحول لكليه أنت مش كنت كاتبها في الرغبات طالما جايب مجموعها في محافظتك.
بس خلي بالك
مينفعش تحول ما بين الجامعات دي القاهره وحلوان وعين شمس . يعني لو جاتلك كليه في حلوان مينفعش تحول القاهره او عين شمس والعكس .
.......
التحويل متاح ليك مكان واحد فقط تحول ليه يعني مش متاح ليك كذا رغبه زي التنسيق لا هي حاجه واحده فقط .
......
لو هتحول من كليه في مكان ابعد إلي مكان أقرب بنسبه 90% التحويل بتاعك بيتقبل لو فرق الدرجات بين الكليتين قليل
وأعلن المجلس الأعلي للجامعات، قواعد إجراء التحويلات لتسجيل الرغبات في مرحلة تقليل الاغتراب بين الكليات والمعاهد في التحويل المناظر وغير المناظر وذلك في حدود نسبة (10%)، ووفقًا للضوابط الآتية:
1 – عدم وجود تحويلات ورقية، ويكون التحويل يكون لمرة واحدة فقط.
2 – ويجب استيفاء كافة الشروط الإضافية للكلية المراد التحويل إليها.
3- ويتم الإلتزام بقواعد التوزيع الجغرافي، ويكون التحويل فقط عن طريق موقع التنسيق الإلكتروني فقط.
4- وتكون المفاضلة بين الطلاب في مرحلة تقليل الإغتراب على أساس مجموع درجات الطالب، ويتم التحويل غير المناظر بعد استيفاء الحد الأدنى للكلية المراد التحويل إليها وفي حدود النسبة المقررة.
5– يكون التحويل المناظر في حدود الحد الأدنى للقطاع والنسبة المقررة من المجلس الأعلي للجامعات، ويمكن التحويلات بين المعاهد العالية الخاصة والمتوسطة.
6– ويتم السماح للطالب الذي تم ترشيحه في التنسيق إلى إحدى المعاهد الخاصة أو المتوسطة بالتقدم للتحويل الإلكتروني فقط إلى معهد أخر في ذات التخصص أو تخصص أخر غير مناظر ويشترط استيفاء الطالب للحد الأدنى المعلن للمعهد المراد التحويل إليه وفي ضوء النسبة المقررة والطاقة الاستيعابية بأسبقية المجموع.
رابط التقديم بالتحويلات وتقليل الاغتراب... من هنا
مشاركتك بالتعليق تعنى أنك قرأت بروتوكول نشر التعليقات على موقعنا، وأنك تتحمل المسئولية الأدبية والقانونية عن نشر هذا التعليق